काठमाडौं–  नेपाली कम्युनिष्ट पार्टी(नेकपा) र राष्ट्रिय मुक्ति पार्टी नेपाल एकता पक्षधर समूहबीच पार्टी समायोजन भएको छ ।  

बुधबार काठमाडौंमा आयोजित एक कार्यक्रमकाबीच नेकपा र सुमन सायमीको नेतृत्वमा रहेको राष्ट्रिय मुक्ति पार्टी नेपालको एकता पक्षधर समूहबीच पार्टी समायोजन भएको हो ।

पार्टी समायोजनका क्रममा दुईपक्षबीच सहमति पत्रमा हस्ताक्षर भएको थियो । सहमति पत्रमा नेकपा संयोजक पुष्पकमल दाहाल प्रचण्ड, सह–संयोजक माधव कुमार नेपाल र सुमन सायमीले हस्ताक्षर गरेका थिए ।

दुईपक्षबीच शासकीय स्वरूप  निर्वाचन प्रणालीमा जनमुखी सुधार गर्न आवश्यकता अनुसार संविधान संशोधन गर्ने सहमति भएको छ ।

त्यस्तै गैरन्यायीक सडक र खोला मापदण्ड समस्या समाधानसम्बन्धी सहमति पनि दुईपक्षबीच भएको छ भने सहकारी पीडित समाधानसम्बन्धी विभिन्न बुँदामा सहमति भएको छ । 

सहमति पत्रको कार्यान्वयनका लागि आवश्यक समन्वय निर्माण गर्न सडक, संसद् र सरकार तीनै तहबाट राजनीतिक संघर्ष सञ्चालन गर्न प्रतिबद्ध रहेको सहमति पत्रमा उल्लेख छ ।