काठमाडौं – नेपाली कांग्रेसका महामन्त्रीद्वय गगन थापा र विश्वप्रकाश शर्माले आयोजना गरेको विशेष महाधिवेशनको बन्दसत्र भोलि बिहान ८ बजेदेखि सुरु हुने भएको छ। बन्दसत्रमा महामन्त्री विश्वप्रकाश शर्माले सांगठनिक प्रतिवेदन तथा अर्का महामन्त्री गगन थापाले राजनीतिक प्रतिवेदन पेस गर्ने कार्यक्रम तय भएको छ।

विशेष महाधिवेशन सचिवालय स्रोतका अनुसार विश्वप्रकाश शर्माको सांगठनिक प्रतिवेदनमा पार्टी संरचनामा युवाको उल्लेख्य सहभागिता सुनिश्चित गर्ने प्रस्ताव समावेश गरिएको छ। प्रतिवेदनअनुसार केन्द्रीय समितिमा ३० वर्षमुनिका २० जना र ३० देखि ४० वर्ष उमेर समूहका २० जनालाई प्रतिनिधित्व गराउने प्रस्ताव गरिएको छ।

त्यसैगरी प्रदेश समितिमा ३० वर्षमुनिका १० जना र ३०–४० वर्ष उमेर समूहका १० जना, जिल्ला समितिमा सोही उमेर समूहका ६–६ जना तथा वडा समितिमा ४–४ जना रहने व्यवस्था प्रतिवेदनमा समेटिएको छ।

सांगठनिक प्रतिवेदनमा नेतृत्व र पदको कार्यकालसम्बन्धी पुरानै प्रस्तावलाई निरन्तरता दिँदै एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटक सांसद मात्र बन्न पाउने व्यवस्था दोहोर्याइएको छ।

पार्टी संरचनालाई थप समावेशी र प्रभावकारी बनाउने उद्देश्यसहित विभिन्न पेशा तथा व्यवसायमा संलग्न व्यक्तिहरूलाई ‘ल्याट्रल इन्ट्री’मार्फत पार्टीमा प्रवेश गराउने व्यवस्था पनि प्रतिवेदनमा उल्लेख छ।

यसैगरी विदेशस्थित जनसम्पर्क समितिमार्फत पार्टीको अन्तर्राष्ट्रिय संरचना निर्माण गर्ने प्रस्ताव गरिएको छ। सो संरचनाअन्तर्गत प्रत्येक देशका जनसम्पर्क समितिका वर्तमान तथा पूर्व अध्यक्षहरू अन्तर्राष्ट्रिय परिषद्का सदस्य रहनेछन्। साथै २७ सदस्यीय अन्तर्राष्ट्रिय जनसम्पर्क समिति गठन गर्ने प्रस्ताव पनि प्रतिवेदनमा समावेश छ।

महामन्त्रीद्वयका प्रतिवेदनमाथि बन्दसत्रमा छलफल हुने र महाधिवेशनले त्यसलाई अन्तिम रूप दिने तयारी गरिएको छ।