काठमाडौं– नेपाली कांग्रेस ललितपुर जिल्ला सभापति जितेन्द्रकुमार श्रेष्ठले पार्टी नेतृत्व सभापति लगायतका पदाधिकारीहरूले विशेष महाधिवेशनमा भएको उपस्थितिलाई नजरअन्दाज गरिएका बन्दसत्रबाट नेतृत्व चयन गर्ने चेतावनी दिएका छन् । पार्टीको विशेष महाधिवेशनमा बोल्दै श्रेष्ठले पार्टी सभापति लगायतलाई महाधिवेशनमा उपस्थिति हुन आह्वान गर्दै सो बताएका हुन् ।

‘यो आजको उपस्थितिलाई केन्द्रीय सभापति लगायत केन्द्रीय पदाधिकारीहरूले नजरअन्दाज नगर्नुहोला, भोलि नीतिगत कुराहरू बन्दसत्रमा प्रवेश गर्नेछन्’, उनले भने, ‘आज यत्रो जनमानस ७७ वटै जिल्लाबाट महाधिवेशन साथीहरूको उपस्थिति छ, यो जमातलाई नजरअन्दाज गर्नुभयो भने नीति अधिवेशनबाट नेतृत्व परिवर्तनको पनि अधिवेशन हुनसक्छ, हेक्का राख्नुहोला ।’

साथै, श्रेष्ठले आफूहरू पार्टी फुटाउन नलागेको भन्दै ६ भाई टिकेको मात्रै कुरा नसुन्न सभापति शेरबहादुर देउवालाई सुझाए । ‘हामी पार्टी फुटाउन होइन, पार्टीलाई एकताबद्ध बनाएर जान यो विशेष महाधिवेशन आह्वान गरेका हौं, आउनुस अझ पनि समय छ, हाम्रो कारणले पार्टी फुट्ने छैन, यी टिके छ भाइको मात्रै कुरा नसुन्नुस आदरणीय सभापति ज्यु, हामी पनि तपाईंकै भाइ भतिजा हौं, हाम्रा पनि कुरा सुन्नुहोला आदरणीय सभापति ज्यु’, उनले भने ।

नेपाली कांग्रेसको विशेष अधिवेशनलाई नेपाली जनताले हेरिरहेको भन्दै गोजीबाट टिकट दिएर आगामी निर्वाचनमा जित हासिल हुन नसक्ने पनि उनले बताए ।