काठमाडौं– सञ्चार तथा सूचना प्रविधिमन्त्री जगदीश खरेलले आगामी निर्वाचनपछि धेरै युवाहरू नीति निर्माण गर्ने तहमा पुग्ने बताएका छन् ।  

शुक्रबार काठमाडौंमा सूचना प्रविधि विभागसँग छलफल गर्दै मन्त्री खरेलले जेन-जी आन्दोलनपछि युवाहरूलाई पनि राज्यको मूलधारमा ल्याउनका लागि आवश्यक व्यवस्था भएको भन्दै निर्वाचनपछि धेरै युवाहरू नीति निर्माण गर्ने तहमा पुग्ने बताएका हुन् । 

निर्वाचनपछिको नयाँ संसद्मा युवाहरूको वर्चस्व हुने उनको भनाइ छ । उनले अन्य देशको तुलनामा नेपालको सूचना प्रविधि क्षेत्र निकै पछाडि परेकाले यसलाई समयानुकूल बनाउन ढिलाइ गर्न नहुने बताए । अव युवाहरूले नै सूचना प्रविधिका माध्यमबाट नेपाल बनाउने आधार तयार भएको उनले बताए । 

मन्त्री खरेलले सूचना प्रविधि विभागलाई आवश्यक स्रोत साधन व्यवस्थापनका लागि मन्त्रालयले गम्भीर भएर काम गरिरहेको उल्लेख गरे । आफ्नो कार्यकाल सकिएपछि पनि सचेत नागरिकको सदैव देशका लागि काम गर्ने मन्त्री खरेलले बताए ।