काठमाडौं – नेपाली कम्युनिस्ट पार्टीका नेता वर्षमान पुनले नेत्रविक्रम चन्द ‘विप्लव’ नेतृत्वको नेकपा (माओवादी) सँग एकता तत्कालका लागि असम्भव जस्तै भएको बताएका छन् ।

मंगलबार पार्टी केन्द्रीय कार्यालयमा सञ्चारकर्मीसँग कुरा गर्दै नेता पुनले यस्तो बताएका हुन् । उनले विप्लवसँग पार्टी एकताको लागि केही कुरा नभएको पनि बताए । तत्कालीन नेकपा (एकीकृत समाजवादी) सँगको एकताको समयमा विप्लव छुटेको भन्दै भन्दै भविष्यमा आउन चाहे स्वागत गर्ने बताए ।

‘विप्लवजीसँग केही कुरा भएको छैन । अस्ति आउनुपर्थ्यो, छुट्नुभयो,’ उनले भने, ‘अब आउनुहुन्छ भने स्वागत छ । अहिले त्यस्तो आउने सम्भावना हामीले देखेका छैनौँ तत्काललाई ।’

उनले नेकपा व्यवस्था र संविधान निर्माणका लागि लडेको पार्टी भएको भन्दै नयाँ पुराना कुनै पनि शक्तिसँग नडराएको जिकिर गरे ।