काठमाडौं- नेपाली कम्युनिस्ट पार्टीले आगामी पुस २९ गते केन्द्रीय कमिटी घोषणा गर्ने भएको छ ।

गत कात्तिक १९ गते विभिन्न १० वटा कम्युनिस्ट घटकहरू मिलेर बनेको नेपाली कम्युनिस्ट पार्टीले दुई महिनापछि केन्द्रीय कमिटी घोषणा गर्ने भएको हो ।

नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ र सह–संयोजक माधवकुमार नेपालले बोलाएको परामर्श बैठकपछि वरिष्ठ नेता झलनाथ खनालले यस्तो बताएका हुन् ।

‘बैठकले आगामी २९ गते केन्द्रीय कमिटी घोषणा गर्ने निर्णय गरेको छ । त्यही दिन विभागहरू पनि तोक्ने निर्णय भएको छ’, उनले भने ।

उता माघ ११ गते हुने राष्ट्रियसभा निर्वाचनमा पनि आफ्नो हैसियत कायम गरेर भाग लिने निर्णय गरेको उनले बताए ।