काठमाडौं- नेपाल कम्युनिष्ट पार्टी (संयुक्त) ले निर्वाचन र समसामयिक राष्ट्रिय राजनीतिका विषयमा आफ्नो धारणा जनतामाझ लैजान देशव्यापी रूपमा पर्चा वितरण गर्ने निर्णय गरेको छ।

यसै कार्यक्रमको शुभारम्भका अवसरमा पार्टीले काठमाडौंको भोटाहिटी चौकमा कोणसभाको आयोजना गर्ने भएको छ।

सोमबार दिउँसो २ः३० बजे हुने कोणसभामा पार्टी अध्यक्ष चन्द्रदेव जोशी, कार्यवाहक अध्यक्ष घनश्याम भुसाल तथा बयोवृद्ध वरिष्ठ अधिवक्ता कृष्णप्रसाद भण्डारीले सम्बोधन गर्ने कार्यक्रम छ।

पार्टीका अनुसार पर्चा वितरणमार्फत निर्वाचन सन्दर्भ, राष्ट्रिय राजनीति र जनसरोकारका विषयमा पार्टीको दृष्टिकोण स्पष्ट गर्ने उद्देश्य राखिएको छ।

नेपाल कम्युनिष्ट पार्टी (संयुक्त) का प्रमुख प्रचार विभाग प्रमुख दामोदर अर्यालले यसबाट जनतासमक्ष आफ्नो दृष्टिकोण पुग्ने बताएका छन् ।