काठडमाडौं- दुई वाम घटक नेकपा (एमाले) र नेपाली कम्युनिस्ट पार्टीबीच फेरि संवाद हुन थालेको छ।

२०७७ फागुनमा नेकपा विघटित भएपछि एक नदीका दुई किनारा भएका एमाले अध्यक्ष केपी शर्मा ओली र नेपाली कम्युनिष्ट पार्टी (नेकपा)का संयोजक पुष्पकमल दाहाल प्रचण्डबीच फेरि संवाद बाक्लिन थालेको हो ।

खासगरी भदौ २३ र २४ गतेको जेन-जी आन्दोलनपछि बिलखबन्दमा परेका यी दुई दलबीच फागुन २१ को प्रतिनिधिसभा निर्वाचन र त्यसअघि माघ १२ गतेको राष्ट्रियसभा सदस्य निर्वाचनमा मिल्ने विकल्प खोजी हुन थालेको हो ।

भदौ २४ गतेसम्म सत्ता साझेदार रहेको नेपाली कांग्रेसभित्रको आन्तरिक कलह गहिरिँदै जाँदा एमालेसँगको समीकरण कायमै हुने सम्भावना कमजोर भएको छ।

कांग्रेसमा सभापति शेरबहादुर देउवा पक्ष तथा महामन्त्रीद्वय विश्वप्रकाश शर्मा र गगन थापाहरूबीचको शक्ति संघर्षले विभाजनको रेखा कोरिएका बेला एमालेसँग सहकार्यको सम्भावना कमजोर भएको छ।

कांग्रेससँग चुनावी तालमेल या सत्ता सहकार्य कमजोर भइरहेका बेला एमालेले नेकपासँग सम्बन्ध सुधार्ने कोसिस थालेको हो । यो भेट पनि एमाले अध्यक्ष ओलीकै चहानाअनुसार भएको स्रोतले उल्लेख गरेको छ।

आइतबार ललितपुरको च्यासलस्थित एक वाम कार्यकर्ताको घरमा ओली र प्रचण्डबीच एक्ला एक्लै करिब आधा घण्टा लामो संवाद भएको हो ।

यो भेटमा समसामयिक राजनीति, माघ ११ को राष्ट्रिय सभा निर्वाचन र फागुन २१ को प्रतिनिधिसभा निर्वाचनबारे कुराकानी भएको बताइएको छ। प्रचण्डको सचिवालयले यसबारे अरू विस्तृत विवरण खुलाएको छैन ।

दुई नेताबीच माघ ११ गतेको राष्ट्रिय सभा निर्वाचनमा तालमेलको सम्भावनाबारे कुरा भएको छ। तर अझै पनि यी दुई दल सहमतिनजिक पुगेका छैनन् ।

प्रचण्ड आइतबार साँझ नै भारतको यात्रामा जाँदैछन् । भारत जानुअघि दुई नेताबीच भएको यो भेटलाई राजनीतिक कोणमा अर्थपूर्ण मानिएको छ ।

भारतको राजधानी नयाँ दिल्लीमा हुन लागेको पार्टीको एकता सन्देश सभालाई सम्बोधनका लागि प्रचण्ड भारत जाने कार्यक्रम छ । जहाँ उनले भारतीय संस्थापनसँग राजनीतिक भेटघाटको पनि कोसिस गर्नेछन् ।

२०८१ असार १७ गते एमाले अध्यक्ष ओलीले माओवादीसँगको गठबन्धन तोडेर नेपाली कांग्रेससँग मिलेदेखि यी दुई नेताको सम्बन्ध बिग्रिएको छ । तर अब जेन-जी आन्दोलनले संकटमा पारेपछि उनीहरू मिल्ने दिशातिर संवादमा बसेका हुन् ।