काठमाडौं- आगामी पुस २७ गतेदेखि गर्ने भनिएको विशेष महाधिवेशनको राजनीतिक प्रस्ताव तयार पार्न काभ्रेको धुलिखेल पुगेका नेपाली कांग्रेसका महामन्त्री गगनकुमार थापा शुक्रबार बिहान काठमाडौं फर्किएका छन् ।

सभापति शेरबहादुर देउवाले कार्य सम्पादन समितिको बैठक बोलाएपछि उनी बिहानै काठमाडौं फर्किका हुन् ।

काठमाडौं फर्किएका महामन्त्री थापाले शुक्रबार पनि विशेष महाधिवेशन पक्षधर नेताहरुसँग छलफल गर्दैछन् । विशेष महाधिवेशन पक्षधर नेता देवराज चालिसेसहितले शुक्रबार नै पत्रकार सम्मेलन गर्ने अब कुनै विकल्प नरहेको बताइसकेका छन् ।

थापा केही दिन धुलिखेल बसेर विशेष महाधिवेशनको राजनीतिक प्रस्ताव तयार पार्न लागेका थिए । उनी बिहीबार साँझ धुलिखेल पुगेका थिए ।

सभापति देउवाले शुक्रबार दिउँसो ३ बजे बस्ने गरी कार्यसम्पादन समिति बैठक राखेका छन् ।

महामन्त्री थापा पहिले विशेष महाधिवेशन पक्षधर नेताहरूसँग छलफल गरेपछि मात्रै कार्यसम्पादन समितिको बैठकमा सहभागी हुने छन् ।

बिहीबार साँझ सभापति देउवाले महामन्त्रीद्वय थापा र विश्वप्रकाश शर्मालाई छलफलका लागि महाराजगञ्जमा डाकेका थिए । महामन्त्रीद्वय उक्त छलफलमा गएनन् ।

बरू पन्ध्रौँ महाधिवेशनको कार्यतालिका रोकेर थापा र शर्माले विशेष महाधिवेशनको तयारी थालेको घोषणा गरेका थिए ।