काठमाडौं– राष्ट्रिय स्वतन्त्र पार्टीले समानुपातिक बन्दसूचीबारे सरोकारवाला पक्षबाट प्राप्त प्रतिक्रिया र सुझावप्रति ध्यानाकर्षण भएको जनाएको छ।

 बुधबार विज्ञप्ति जारी गर्दै आगामी फागुन २१ गते हुने प्रतिनिधिसभा सदस्य निर्वाचनका लागि निर्वाचन आयोगमा बुझाएको बन्दसूचीबारे आइरहेका प्रतिक्रियाप्रति रास्वपाको ध्यानाकर्षण जनाएको हो ।

पार्टीले समय अभावका बीच अन्तिम समयमा आवश्यक राजनीतिक संवाद र सहमति गर्नुपर्ने अवस्थाका कारण सूची तयार गर्ने प्रक्रियामा केही कमीकमजोरी देखिन सक्ने उल्लेख गरेको छ। यस्ता त्रुटि सच्याउन निर्वाचन आयोगले दिएको समयसीमाको सदुपयोग गरिने जनाइएको छ।

रास्वपाले बन्दसूचीमा देखिएका त्रुटि वा सुधार गर्नुपर्ने विषय आयोगले तोकेको समयभित्र सच्याएर पुनः पेश गर्ने स्पष्ट पारेको छ।

यसका लागि पार्टीले पौष १७ गते बिहान १० बजेभित्र यथोचित सुझाव प्रदेश सभापतिमार्फत वा सिधै पार्टी केन्द्रीय कार्यालयमा बुझाउन आग्रह गरेको छ।