काठमाडौं– नेपाली कांग्रेसका महामन्त्री गगनकुमार थापाले आम जनताको परिवर्तनको आकाङ्क्षा स्वच्छ र स्वस्थ चुनावी प्रतिस्पर्धाका माध्यमबाट मुखरित हुने बताएका छन् ।

राष्ट्रिय एकता र मेलमिलाप दिवसको अवसरमा आज सामाजिक सञ्जालमार्फत शुभकामना व्यक्त गर्दै महामन्त्री थापाले एकले अर्कोलाई विरोध र निषेध गरेर नभइ राष्ट्र निर्माणको सामूहिक उत्तरदायित्व बोधको साथ अगाडि बढ्ने प्रेरणा सबैमा मिलोस् भन्ने कामना गरेका छन् ।

उनले लेखेका छन्– ‘एकले अर्कोलाई विरोध र निषेध होइन, राष्ट्र निर्माणको सामूहिक उत्तरदायित्व बोधको साथ अगाडि बढ्ने प्रेरणा हामी सबैलाई मिलोस् भन्ने शुभकामना व्यक्त गर्दछु।’

महामन्त्री थापाले पौष मसान्त भित्र पार्टीको विशेष महाधिवेशन गर्ने कार्य विधानतः बाध्यकारीमात्र नभएर पार्टीभित्रको एकता र आत्मविश्वासको लागि अनिवार्य बनेको उल्लेख गरेका छन् ।

अहिले राष्ट्रप्रतिको दायित्व निर्वाह गर्न सक्ने कांग्रेस बनाउनु नै प्रत्येक कांग्रेस कार्यकर्ताको युगीन जिम्मेवारी रहेको भन्दै थापाले यही जिम्मेवारी निर्वाह गर्न पुस मसान्तभित्र विशेष महाधिवेशन आह्वान गर्ने बाटोमा अगाडि बढेको स्पष्ट पारेका छन् ।

उनले नेपाली कांग्रेसले यही उत्तरदायित्व बोधका साथमा राष्ट्रिय भूमिका निर्वाह गर्न आत्मविश्वासको विन्दु खोजिरहेको र त्यो आत्मविश्वास एकताबाट नै आउने उनको तर्क छ ।

उनले भनेका छन्– ‘नेपाली कांग्रेसले यही उत्तरदायित्व बोधका साथमा राष्ट्रिय भूमिका निर्वाह गर्न आत्मविश्वासको विन्दु खोजिरहेको छ। यो आत्मविश्वास हाम्रो एकताबाट नै आउँछ । अनि एकता के बाट आउँछ ? निषेधबाट होइन, फरक विचारलाई बेवास्ता गरेर होइन– भिन्न मतहरू व्यक्त गर्ने साझा मञ्चको प्रयोगबाट मात्र त्यो एकताको उद्भव हुन्छ । त्यो भनेको आजको समयमा कांग्रेसको विशेष अधिवेशन नै हो।’

थापाले यस मार्गमा हातेमालो गर्दै एकताबद्ध हुन पार्टीका सबै नेता-कार्यकर्ताहरूमा आह्वान समेत गरेका छन् ।

आजभन्दा ४९ वर्ष अघि २०३३ साल पुस १६ गते विषम परिस्थितिमा ‘राष्ट्रिय एकता र  मेलमिलाप’ को नीति लिएर बीपी कोइराला, गणेशमान सिंहलगायत नेताहरू भारतको निर्वासनबाट नेपाल फर्किएका थिए ।