सियोल– दक्षिण कोरियाली राष्ट्रपति ली जे म्युङले आफ्ना समकक्षी सी जिनपिङको निमन्त्रणामा आगामी आइतबारदेखि बुधबारसम्म चीन भ्रमण गर्ने योजना बनाएका छन् । यो भ्रमण सन् २०१९ पछि दक्षिण कोरियाली नेताको पहिलो चीन भ्रमण हुनेछ ।

ली र सीले अन्तिम पटक नोभेम्बरमा दक्षिण कोरियाली सहर ग्योङ्जुमा आयोजित एशिया–प्रशान्त आर्थिक सहयोग (एपेक) शिखर सम्मेलनको अवसरमा भेटेका थिए । यस भ्रमणमा राष्ट्रपति लीले आफ्ना पूर्ववर्ती युन सुक येओलको नेतृत्वमा बिग्रिएका द्विपक्षीय सम्बन्धहरूलाई सुधार्ने र चीनसँग पुनःस्थापना गर्ने प्रयासमा केन्द्रित हुने अपेक्षा गरिएको छ ।

सियोलले दशकौँदेखि चीन र यसको मुख्य सुरक्षा ग्यारेन्टर संयुक्त राज्य अमेरिकाबीच सन्तुलन कायम राख्दै आएको छ । सन् २०१६ मा अमेरिकामा निर्मित थाड क्षेप्यास्त्र प्रतिरक्षा प्रणाली तैनाथ गर्ने निर्णयपछि चीनसँगको सम्बन्ध बिग्रिएको थियो । त्यसपछि बेइजिङले दक्षिण कोरियाली व्यवसायमा आर्थिक प्रतिबन्ध लगाएको र समूह भ्रमणहरूमा रोक लगाएको थियो ।

सांस्कृतिक विवादहरू, जस्तै कोरियाली परिकार किम्चीको उत्पत्ति सम्बन्धी चीनको दाबीले पनि दक्षिण कोरियाली जनमतमा असर पारेको छ । सन् २०२२ मा पहिलो पटक गरिएको मतदानमा दक्षिण कोरियालीहरूले जापानभन्दा चीनप्रति बढी अविश्वास व्यक्त गरेका थिए र यो प्रवृत्ति पछिल्ला वर्षहरूमा जारी छ ।

प्राविधिक रूपमा उत्तर कोरियासँग युद्ध अवस्थामा रहेको दक्षिण कोरियाले बेइजिङसँगको सम्बन्धलाई पनि संवेदनशील रूपमा व्यवस्थापन गर्दै आएको छ । गत महिना राष्ट्रपति लीले चिनियाँ नेतालाई उत्तर कोरियासँग बिग्रिएको सम्बन्ध सुधार्ने सियोलको प्रयासमा साझेदारका रूपमा प्रस्तुत गरेका थिए।

यसैबीच चीनसँग बढ्दो विवादमा दक्षिण कोरिया जापानको पक्षमा रहने हो कि भन्ने पत्रकारहरूले सोधेका प्रश्नमा राष्ट्रपति लीले भने, ‘पक्ष लिनुले केवल तनाव बढाउँछ ।’