काठमाडौं‍- ललितपुरको च्यासलस्थित नेकपा एमालेको केन्द्रीय कार्यालय परिसरमा एउटा पेस्तोल भेटिएको छ।

पार्टी कार्यालय परिसर सफाइका क्रममा मंगलबार पेस्तोल फेला भेटिएको हो। भेटिएको उक्त पेस्तोल प्रहरीलाई बुझाइएको छ।

एमाले उपाध्यक्ष पृथ्वी सुब्बा गुरुङका अनुसार तुलसीलाल स्मृति भवनको पश्चिम गेटको अगाडितर्फको भागमा प्रहरीले प्रयोग गर्ने पेस्तोल भेटिएको हो। प्रहरीले उक्त पेस्तोल लिइसकेको पनि गुरुङले खबरहबलाई जानकारी दिए।

‘म बाहिर भएकाले थप विवरण थाहा भएन, तुलसीलाल स्मृति भवनतिरको पश्चिम गेटको अगाडितर्फ पेस्तल भेटिएको सूचना आएको छ’, गुरुङले खबरहबलाई भने ।

एमाले कार्यालय सचिव भीष्म अधिकारीका अनुसार प्रहरीको टोली त्यहाँ पुगेर पेस्तोल लिएको छ । उनका अनुसार उक्त पेस्तोल प्रहरीकै भएको खुलेको छ।

अधिकारीका अनुसार गोलीबिनाको पेस्तोल ललितपुर प्रहरीले लगेको छ। ‘सामान्य मुचुल्का बनाएर प्रहरीले पेस्तो लानुभएको छ। पुरानो पेस्तोल थियो, गोली थिएन’, अधिकारीले खबरहबलाई भने, ‘सरसफाइ गर्ने क्रममा भेटिएको हो । कसले राख्यो भन्ने थाहा भएन । प्रहरीले हाम्रै हो भन्नुभयो।’

गत भदौ २४ गतेको जेन-जी आन्दोलनका बेला पेस्तोल भेटिएको स्थाननजिकै एउटा गाडीसमेत जलेको थियो।