काठमाडौं – नागरिक उन्मुक्ति पार्टीका नेता रेशम चौधरीले आफूलाई आगामी निर्वाचन लागि स्वच्छ छविको उम्मेदवार रहेको दाबी गरेका छन् । 

समानुपातिक उम्मेदवारको बन्दसूची बुझाउन निर्वाचन आयोग पुगेका उनले अदालतले अयोग्य ठहर्याएको भन्ने सञ्चारकर्मीको प्रश्नको खण्डन गरेका हुन् ।  

‘तपाईको प्रश्न नै गलत हो । मलाई उम्मेदवार बन्न नदिने हो भने शेरबहादुर देउवा, पुष्पकमल दाहाल ‘प्रचण्ड’ देखि जेल परेका रवि लामिछाने जेन–जी आन्दोलनमा बगेको रगत सुक्न नपाउँदै  तत्कालीन प्रधानमन्त्री केपी शर्मा ओली र बालेन्द्र शाह (बालेन) कसरी पाउने ? थारू भएकै कारण रेशम चौधरीले चुनाव लड्न नपाउने ? उनले उल्टै प्रश्न गरे । 

टिकापुर घटनामा फौजदारी कार्यविधि संहिताअनुसार नै आफूले राष्ट्रपतिबाट सजाय मिनाहा पाएकोमा प्रश्न उठाउनु आवश्यक नरहेको बताए । 

‘फौजदारी कार्यविधि संहिताअनुसार घटना भएको समयमा त्यहाँ नभएको व्यक्तिलाई मुद्दा लगाउन पाइँदैन, म घटनास्थलमै थिइनँ भने म कसरी दोषी भएँ ?’

आफूलाई निर्वाचन लड्नबाट रोकेमा देशमा अर्को दुर्घटना निम्तिने भन्दै उनले चेतावनी समेत दिए ।