काठमाडौं- प्रमुख दल नेपाली कांग्रेसमा आगामी पुस २६ गतेदेखि पन्ध्रौँ महाधिवेशन नहुने निश्चित भएको छ।

निर्धारित पन्ध्रौँ महाधिवेशनमा नहुने निश्चित जस्तै भएपछि विशेष महाधिवेशन पक्षधरले शुक्रबार सानेपा पुगेर स्मरणपत्र बुझाएका छन् ।

नियमित महाधिवेशन नहुने निश्चित भएपछि अब २४ सय भन्दा धेरै प्रतिनिधिले हस्ताक्षर गरेर मागेबमोजिम विशेष महाधिवेशनमा जानुपर्ने भन्दै स्मरण पत्र बुझाइएको ।

विशेष महाधिवेशनका लागि हस्ताक्षर अभियानका अगुवा गुरुराज घिमिरेसहितले महामन्त्रीद्वय गगनकुमार थापा र विश्वप्रकाश शर्मामार्फत् शुक्रबा स्मरणपत्र बुझाएका हुन् ।

कांग्रेस प्रवक्ता डा. प्रकाशशरण महतले भनेजस्तै रकेटको गतिमा महाधिवेशनका कार्यक्रम अघि नबढेपछि अब विशेष महाधिवेशनको दबाब बढेको हो ।

प्रतिनिधिको स्मरण पत्र बुझ्नै महामन्त्री गगन थापाले अब विशेष महाधिवेशनको विकल्प नरहेको बताए। ‘विशिष्ठ कारण देखाएर विशेष महाधिवेशन अनिवार्य गरिनुपर्छ । हस्ताक्षरअनुसार पुस मसान्तसम्मको अवधि अर्थात् तीन महिनाभित्र विशेष महाधिवेशन बाध्यकारीको थियो’, थापाले भने, ‘नियमित महाधिवेशन नहुने भएपछि अब विशेष महाधिवेशनमा जानुको अर्को विकल्प छैन ।’

विशेष महाधिवेशन पुस मसान्तसम्म गर्ने कुरा केन्द्रीय कार्यसमिति र कार्यवाहक सभापति पूर्णबहादुर थापाको अनिवार्य जिम्मेवारी भएको पनि थापाले बताए ।

‘तोकिएको तालिका अनुसार पन्ध्रौँ महाधिवेशन गरिसकेको भए यो मागको अर्थ हुँदैन थियो । अब विशेष महाधिवेशन अनिवार्य शर्त हो’, थापाले भने, ‘यो विषयबारे हामी कार्यवाहक सभापतिलाई थप जानकारी माग्छौँ ।’

अर्का महामन्त्री विश्वप्रकाश शर्मा विधानमा जे भनिएको व्यवस्था छ, त्यसलाई पालना गर्नु केन्द्रीय कार्य समिति र कार्यवाहक समितिको पनि जिम्मेवारी बनेको बताए । उनले पनि थापाले जस्तै अब विशेष महाधिवेशनको विकल्प नरहेको बताए ।