काठमाडौं– राष्ट्रिय स्वतन्त्र पार्टीका पूर्वसांसद गणेश पराजुलीले काठमाडौं महानगरपालिकाका मेयर बालेन्द्र शाहसँगको संवाद सहमतितिर अघि बढेको दाबी गरेका छन् । 

पराजुलीले मेयर बालेन्द्र राष्ट्रिय स्वतन्त्र पार्टीमा जोडिनका लागि सहमतिउन्मुख रहेकाले चाँडै नै सकारात्मक खबर सुन्न पाइन सक्ने दाबी गरे । 
 
राष्ट्रिय स्वतन्त्र पार्टीसँग बालेन संवादमा रहेको बताउँदै पराजुलीले देशमा सबै वैकल्पिक शक्तिहरू एक भएर जाने कुरामा तयार भएको उनले उल्लेख गरे । यसका सहमतिका केही खाका तयार भइरहेको पनि उनले बताएका छन् । 

‘हामीले लामो समयदेखि यसबारे छलफल गरिरहेका थियौँ। वार्ता सकारात्मक भएर सहमतिउन्मुख पनि छ’, पराजुलीले खबरहबलाई भने, ‘राष्ट्रिय स्वतन्त्र पार्टीको विकल्पमा कोही जान तयार हुनुभएको छैन । हामीले वार्तालाई सकारात्मक र सहमतिउन्मुख भनेका छौँ ।’ 

सबै शुभचिन्तक र नेपाली जनताको आशाअनुरूप नयाँ सहमतिका केही कुराहरू शुक्रबार नै सार्वजनिक हुन सक्ने देखिएको उनले बताएका छन्। पराजुलीले छलफल र वार्ता जारी रहेकाले चाँडो निकासा दिनेसमेत दाबी गरेका छन्।