काठमाडौं– केही समयअघि मात्रै ‘एक्स्ट्रा अर्डिनरी ग्रिन कार्ड’ लिएर अमेरिका लागेका कलाकार सिताराम कट्टेल ‘धुर्मुस’ र कुञ्जना घिमिरे ‘सुन्तली’ले एक वर्ष अघि नै अमेरिकामा कम्पनी खोलेको भेटिएको छ । 

उनीहरूले अमेरिका जानुअघि एक वर्ष अघि नै अमेरिकाको फ्लोरिडा राज्यमा अन्य दुई जना व्यक्तिहरूसँग मिलेर सुभिना एलएलसी नामक कम्पनी खोलेको भेटिएको हो ।

फ्लोरिडा राज्यको कम्पनी हेर्ने सरकारी कार्यालयको वेबसाइटमा सन् २०२४ डिसेम्बर १२ मा केदार आचार्य, कुञ्जना घिमिरे र तेज कार्कीको नाममा सुभिना एलएलसी नामको कम्पनी खोलेको कागजात देखिएको छ । तर, प्राप्त कागजातमा कम्पनी के कस्तो भन्ने विषयमा भने खुलाइएको छैन ।

सुटुक्क अमेरिका लागेका कलाकार धुर्मुस अमेरिका पुगिसकेपछि डिसेम्बर १२ मा एक बकपत्र भन्दै सामाजिक सञ्जालमार्फत आफू अमेरिका आउनुको कारण सार्वजनिक गरेका थिए । सो बकपत्रमा उनले आफूहरू छोरीको उपचारको निम्ति अमेरिकामा आएको उल्लेख गरेका थिए ।

चितवनमा धुर्मुस सुन्तली फाउन्डेसनको नामबाट कलाकार कट्टेलले नेतृत्व गरेर निर्माण गर्न लागेको गौतम बुद्ध क्रिकेट रंगशाला निर्माणकै क्रममा आवश्यक आर्थिक सहयोग नजुटेर स्थगित भएको विषय भने विवादित रहेको छ । कलाकार कट्टेलले सो निर्माणको क्रममा १८ करोड बढी ऋण भुक्तान गर्न बाँकी रहेको र सो कार्यमा भरतपुर महानगर लगायत सरकार पक्षले सहयोग नगरेको आरोप लगाउँदै आएका छन् ।

तर, उनको फाउन्डेसनले गरेको आय व्ययको हिसाब किताबको पारदर्शितामा पनि धेरैले प्रश्न उठाउँदै आएका छन् ।