कलैया- नेपाल कम्युनिष्ट पार्टी प्रदेश नम्बर २ का अध्यक्ष प्रभु साहले एकता विरोधीहरुले पार्टीभित्र भाँडभैलो मचाइरहेको बताएका छन् ।

दशै, दिपावली तथा छठ पर्वको अवसरमा सोमबार बाराको विश्रामपुर गाउँपालिका-२, बरनिया बजारमा नेकपा गाउँ कमिटीद्वारा आयोजित शुभकामना आदानप्रदान तथा अन्तरक्रिया कार्यक्रममा अध्यक्ष साहले पार्टी एकता भाँड्न खोज्ने तत्वहरुबाट सावधान रहन कार्यकर्ता पङ्क्तिलाई आग्रह गरे ।

अध्यक्ष साहले भने, ‘नेपाली कम्युनिष्ट आन्दोलनलाई मात्र नभई राष्ट्रिय राजनीतिलाई नयाँ ढंगले दिशाबोध गर्न, मुलुकमा स्थायित्व कायम गर्न, मजबुत र स्थिर सरकार निर्माण गर्न तथा मुलुकबाट विभेदको अन्त्य गरी समृद्ध नेपाल निर्माण गर्ने महान उद्देश्य सहित हामीले ऐतिहासिक पार्टी एकता गर्यौँ । तर यो एकता कतिपयहरूलाई मन परेन । तिनीहरू आज पार्टीभित्र भाडभैलो मच्चाएर देशमा अस्थिरता सृजना गर्न उद्धत छन् ।’

अध्यक्ष साहले बारासहित प्रदेश नम्बर २ को बिकास लागि आफू हरबखत सक्रिय रहेको जीकिर गरे ।