काठमाडौं- गत भदौ २३ र २४ गते भएको जेन-जी आन्दोलनका घटनासम्बन्धी जाँचबुझ आयोगले अनुसन्धानको दायरामा रहेका तीन उच्च अधिकारीमाथिको विदेश भ्रमण तथा काठमाडौं उपत्यका बाहिर जान नपाउने प्रतिबन्ध फुकुवा गरेको छ।

आयोगको सचिवालयले गृह मन्त्रालयलाई पत्र पठाउँदै पूर्वगृहसचिव गोकर्णमणि दुवाडी, नेपाल प्रहरीका पूर्व महानिरीक्षक चन्द्रकुवेर खापुङ र काठमाडौं जिल्लाका पूर्व प्रमुख जिल्ला अधिकारी छविलाल रिजालमाथि लगाइएको यात्रा प्रतिबन्ध हटाइएको जानकारी गराएको हो।

आयोगका अनुसार अनुसन्धानका क्रममा ती व्यक्तिहरूको विदेश भ्रमण रोक्का लगाउने र आयोगको स्वीकृति बिना काठमाडौं उपत्यका नछाड्ने व्यवस्था गर्न कात्तिक २७ को बैठकबाट निर्णय गरिएको थियो।

उक्त निर्णयअनुसारको कार्य सम्पन्न भइसकेकाले अब उक्त प्रतिबन्ध फुकुवा गर्ने निर्णय आयोगले मंगलबार गरेको जनाएको छ। उक्त निर्णय कार्यान्वयनका लागि गृह मन्त्रालयलाई अनुरोध गरिएको छ।

भदौ २३ र २४ गतेका घटनाको सत्यतथ्य छानबिनका लागि गठन गरिएको जाँचबुझ आयोगले अनुसन्धान प्रक्रिया निरन्तर जारी रहेको जनाएको छ।