काठमाडौं– राष्ट्रिय परीक्षा बोर्डले २०८३ सालमा सञ्चालन हुने कक्षा १२ को वार्षिक परीक्षाका लागि आवेदन खुला गरेको छ ।

परीक्षा बोर्डले मंगलबार सूचना सार्वजनिक गर्दै शैक्षिक सत्र २०८२–०८३ को वार्षिक कार्यतालिका अनुसार वार्षिक परीक्षाका लागि आवेदन फाराम खुला गरेको हो । सूचनामा नियमित तथा आंशिक दुवै तर्फका विद्यार्थीका लागि आवेदन दिन आह्वान गरिएको छ ।

कक्षा १२ का विद्यार्थीले नियमिततर्फ पुस मसान्तभित्र आठ सय रुपैयाँ शुल्कसहित फारम बुझाउन सक्नेछन्छ। त्यो समयमा फारम बुझाउन नसक्नेले थप शुल्कसहित १६ सय रुपियाँसहित माघ १५ गतेसम्म फारम बुझाउन सक्ने सूचनामा उल्लेख छ।

भौतिक, जीव, रसायन विज्ञान, कम्प्युटर र होटल म्यानेजमेन्ट जस्ता विषयका बाह्य परीक्षक आवश्यक पर्ने विषयका विद्यार्थीले थप शुल्क बुझाउनुपर्ने छ ।

बोर्डका अनुसार परीक्षामा नियमिततर्फ रजिस्ट्रेसन नम्बरको सुरुका दुई अङ्क ८२ भएका विद्यार्थी सहभागी हुन पाउनेछन् भने आंशिकतर्फ रजिस्ट्रेसन नम्बरको सुरुका दुई अङ्क ७९, ८० र ८१ भएका परीक्षार्थीले आवेदन दिन पाउने छन्।

सूचनामा नियमित परीक्षार्थी हुनका लागि कक्षा ११ को सैद्धान्तिकतर्फ न्यूनतम ‘डी’ ग्रेड र आन्तरिक वा प्रयोगात्मकतर्फ ‘सी’ ग्रेड प्राप्त गरेको हुनुपर्ने उल्लेख छ। परीक्षा फारम बुझाउँदा विदार्थीले कक्षा ११ को ग्रेडसिट र रजिस्ट्रेसन कार्डको प्रतिलिपि बुझाउनुपर्ने सूचनामा उल्लेख छ।