काठमाडौं- राष्ट्रिय स्वतन्त्र पार्टीले फागुन २१ गतेको निर्वाचनको वातावरण बनाउन सरकारसँग शान्ति सुरक्षाको ग्यारेन्टी खोजेको छ।

आगमी फागुन २१ गते हुने प्रतिनिधिसभा सदस्य निर्वाचनको संसारमा निर्वाचन कानुन र व्यवस्थापन सम्बन्धमा प्रधानमन्त्री सुशीला कार्कीले सिंहदरबारमा गरेको छलफलमा बोल्दै रास्वपा नेता शिशिर खनालले शान्ति सुरक्षाको कुरा उठाएका हुन् ।

उनले रास्वपा सरकारले तोकेकै समयमा निर्वाचन गराउने पक्षमा रहेको पनि बताए । उनले यसअघि नै सभापति रवि लामिछानेले अब संसद् पुनर्स्थापना होइन, निर्वाचनबाटै देशलाई निकास दिनुपर्ने बताइसकेको पनि स्मरण गराए ।

खनालले तर त्यसका लागि शान्ति सुरक्षा चाहिने बताए । ‘चुनावमा शान्ति सुरक्षा चाहिन्छ। नेता पार्टी र उम्मेदवारको सुरक्षाको ग्यारेन्टी हुनुपर्छ’, उनले भने, ‘निर्वाचनका क्रममा मतदाताको सुरक्षा पनि हुनुपर्छ। हामी निर्वाचनमा जान तयार छौँ । तर सरकारले सुरक्षाको प्रत्याभूति दिनु पहिलो शर्त हो ।’