काठमाडौं– तत्कालीन अवस्थामा २०७७ सालमा देखिएको नेकपाको तनावका कारण नेकपा माओवादी केन्द्र छाडेर नेकपा एमालेमा बसेका दुई नेताले फेरि पनि माया पाएका छन् ।

२०७८ मंसिरमा भएको एमालेको १० औं महाधिवेशनबाट पूर्वमाओवादीबाट आएका तीनजना पदाधिकारीमा निर्वाचित भएकामा यस पटक २ जना आउने पक्का भएको छ।

२०७८ मा भएको दशौँ महाधिवेशनको निर्वाचनको मतपरिणामअनुसार उपाध्यक्षमा रामबहादुर थापा बादल तथा सचिवमा टोपबहादुर रायमाझी र लेखराज भट्ट विजयी भएका थिए । तर यस पटक टोपबहादुर नक्कली भुटानी शरणार्थी प्रकरणमा जेलमा छन् ।

यता एघारौँ महाधिवेशनमा उपाध्यक्षमा उठेका बादल र उपमहासचिवमा उठेका लेखराजले लोकप्रिय मत पाइरहेका छन् ।

११३९ मत गणना भइकेकोको अवस्थामा उपाध्यक्षतर्फ बादलले ७७४ मत पाएका छन् । उनले पृथ्वी सुब्बा गुरुङ र विष्णु पौडेलपछि तेस्रो लोकप्रिय मत पाएका छन् । गुरुङले ९०० र पौडेलले ८४६ मत पाएका छन् ।

उता उपमहासचिवमा पनि लेखराजलाई लोकप्रिय मत मिलेको छ । उनले तीन उपमहासचिवमा जित करिब पक्का गरेका छन् ।

उनले ११३९ मत गनेको अवस्थामा उपमहासचिवमा सबैभन्दा लोकप्रिय मत पाएका छन् । ताजा अवस्थामा उनी ७३४ मतसहित पहिलो स्थानमा छन् । उता योगेश भट्टराई ७०९ मत पाएका छन् । त्यसैगरी रघुवीर महासेठले ६८९ मत पाएका छन् ।