काठमाडौं- नेकपा (एमाले) को ११औं राष्ट्रिय महाधिवेशनअन्तर्गत नयाँ नेतृत्व चयनका लागि मतदान जारी छ । ८० वटा विद्युतीय भोटिङ प्रयोग हुँदा पनि अति नै सुस्त गतिमा मतदान भइरहेको छ।

निर्वाचन आयोगका उपाध्यक्ष सानुराजा पोखरेलले बिहान ९ बजेर १२ मिनेटमा मतदान सुरू भएयता साँझ ५ बजेर २ मिनेटसम्म ८०२ मत खसेको जानकारी दिए ।

उनका अनुसार ८ घण्टाको अवधिमा सोचेभन्दा सुस्त गतिमा मतदान भएको हो । पोखरेलले छिटोमा ९ मिनेटदेखि ढिलोमा २ घण्टा १२ मिनेटसम्म एकजना मतदातालाई मतदान गर्न समय लागेको पनि जानकारी दिएका छन् ।

एमालेले भक्तपुरको सल्लाघारीबाट गत मंसिर २७ गते एघारौँ महाधिवेशन सुरू गरेको थियो । महाधिवेशनअन्तर्गत बुधबार बिहान ९ बजेर १२ मिनेटबाट मतदान सुरू भएको थियो ।

यो महाधिवेशनमा कूल २ हजार २ सय ६३ जना प्रतिनिधि छन् । एक जना मतदातालाई मत हाल्न करिब ३० मिनेटको समय लाग्ने आँकलन गरिए पनि २ घण्टाभन्दा धेरै लागेको छ ।

यो मतदान यही गतिमा अघि बढे बिहीबार मध्याह्नसम्मको समय लाग्ने सम्भावना देखिएको छ। महाधिवेशनमा केपी शर्मा ओली र ईश्वर पोखरेल समूहले प्यानलसहित प्रतिस्पर्धामा छन् ।