काठमाडौं- नेकपा एमालेकी नेतृ बिन्दा पाण्डेले पार्टीको उपाध्यक्ष पदमा उम्मेदवारी दिएकी छन् । नेतृ अष्टलक्ष्मी शाक्यको प्रस्तावमा उनले उपाध्यक्ष पदका लागि उम्मेदवारी दिएकी हुन् ।

पार्टीको जारी महाधिवेशनमा नेतृत्व चयनको प्रक्रिया अघि बढ्दै जाँदा पाण्डेले उपाध्यक्ष पदमा उम्मेदवारी दर्ता गराएकी हुन् ।

अष्टलक्ष्मीले पार्टीको ११औँ महाधिवेशनसँगै पार्टीको जिम्मेवारीबाट बाहिरिने घोषणा गरेकी छन् । शाक्य बाहिरिदै गर्दा उनले पाण्डेलाई अगाडि बढाएकी हुन् ।

पाण्डे एमालेको बौद्धिक नेतृमा पर्छिन्। पर्याप्त ज्ञान र क्षमता हुँदाहुँदै पनि पार्टीमा अवसर नपाएकी नेतृ हुन् उनी । स्थायी कमिटी सदस्य उनी महिला सहभागिता र समानताबारे पार्टी र बाहिर लामो समयदेखि काम गर्दै आएकी छन्।

विद्यार्थी आन्दोलनबाट उदाएकी पाण्डे २०३७ सालमा स्कुल पढ्दादेखि राजनीतिमा लागेकी थिइन्। २०६२ सालमा एमाले महिला विभागले लैङ्गिक मुद्दा सम्बन्धी आठ वटा बुँदा बनाएर पारित गर्दा त्यसको साक्षी उनले पुस्तकसमेत प्रकाशन गरेकी छन्।

महाधिवेशनले नयाँ नेतृत्व चयन गर्ने तयारी गरिरहेका बेला उपाध्यक्ष पदमा विभिन्न नेताहरूको उम्मेदवारी परिरहेको छ ।