काठमाडौं– प्रतिनिधिसभाका सभामुख देवराज घिमिरेले वर्तमान सरकारले संसद् विघटन गरेर संसदीय व्यवस्थामाथिको प्रहार गरेको बताएका छन् ।  

संसद् सेवा दिवसका अवसरमा संघीय संसद् सचिवालय आइतबार सिंहदरबारमा आयोजना गरेको कार्यक्रममा सभामुख घिमिरेले जेन-जी आन्दोलनका क्रममा भाद्र २४ गते संसद् भवनमा आक्रमण गरी ध्वस्त पार्ने काम भएको र भाद्र २७ गते संसद्लाई नै विघटन गर्नुको सोझो सान्दर्भिकता नरहेको भन्दै संसदीय व्यवस्थामाथिको प्रहार भएको बताए ।

पछिल्लो समय सरकारले संसद् र यसको सचिवालयमाथि आर्थिक र प्रशासनिक रुपमा अदृश्य बन्देज लगाउने प्रयास गरिहरेको उनले बताए ।

सभामुख घिमिरेले संसद् सरकारको अधीनमा रहने कुनै एउटा शाखा नभएको भन्दै स्वायत्त व्यवस्थापिकामाथि आँच आउने कुनै पनि गतिविधि नगर्न सरकारलाई सचेत समेत गराए । उनले संसद् कमजोर हुँदा लोकतन्त्र कमजोर हुने र लोकतन्त्र कमजोर भए राज्यले असफल हुने बताए । 

संसद् विघटनको मुद्दामा अदालतले समयमा नै न्याय निरूपण गर्ने उनको विश्वास छ । 

उनले राजनीतिक उतारचढावकाबीच संसद् सचिवालयका कर्मचारीहरूले निष्पक्ष रुपमा आफ्नो पेसागत धर्म निर्वाह गर्नुपर्नेमा जोड दिए ।