काठमाडौं- नेकपा एमालेका अध्यक्ष केपी शर्मा ओलीले निर्वाचन आयोगमा दर्ता भएका अन्य १४१ वटा दलहरूलाई आफूहरूसँग लड्न चुनौती दिएका छन् ।

बिहीबार सम्पादकहरूसँगको अन्तरक्रियाका क्रममा बोल्दै उनले राष्ट्रिय स्वतन्त्र पार्टी, कुलमान घिसिङको उज्यलो नेपाल, हर्क साम्पाङको श्रम संस्कृति पार्टीसहितलाई यस्तो चुनौती दिएका हुन् ।

‘अहिले निर्वाचन आयोगमा १४३ वटा दर्ता भएछन् । यति धेरै दल केका लागि आएका हुन् ?’, उनले भने, ‘सम्पादकमा असफल भएपछि दल खोल्ने, अन्त केही गर्न नसकेपछि दल खोल्ने चलन अहिले चलेको छ ।’

उनले अहिले आयोगमा दर्ता भएका दलहरू सबै मिलेर लड्न आए आफूहरू तयार रहेको बताए । ओलीले मंसिर १९ गते कांग्रेस सभापति शेरबहादुर देउवासँग अर्थपूर्ण र राजनीतिक सन्देश दिने गरी संवाद भएको बताए ।

‘देउवाजीसँग गम्भीर र अर्थपूर्ण संवाद भएको छ। यसको राजनीतिक सन्देश विस्तारै बाहिर आउँछ’, उनले भने, ‘देश बनाउने नेपाली कांग्रेस र एमाले छँदैछन् । यति धेरै दल के का लागि चाहिएको हो ? दर्ता भएका १४१ दल मिलेर कांग्रेस-एमालेसँग लड्न आए हुन्छ । हामी सामना गर्न तयार छौँ ।’