काठमाडौं– नेकपा (एमाले) का सचिव गोकर्ण विष्टले अहिलेको अवस्थामा पार्टीमा नेतृत्व हस्तान्तर र रूपान्तरण गर्नुपर्ने आवश्यकता रहेको बताएका छन् । 

एमाले महाधिवेशनका सन्दर्भमा बुधबार काठमाडौंमा आयोजित अन्तर्क्रियामा विष्टले अहिले देश र पार्टीभित्र पनि संकट पैदा भएकाले सामूहिक नेतृत्वका लागि पार्टीमा नेतृत्व हस्तान्तर र रूपान्तरण गर्नुपर्ने आवश्यकता रहेको बताएका हुन् । 

उनले ईश्वर पोखरेलको समूहबाट आफूहरू प्रतिस्पर्धामा उत्रने जानकारी दिए । यथास्थितिबाट माथि उठेर नयाँ चुनौतीको सामना गर्नसक्ने नेतृत्व आवश्यक भएको उनको भनाइ छ । 

विष्टले लोकतान्त्रिक अभ्यास गर्दा पछि परेका नेताहरूलाई निषेध गर्ने परिपाटीलाई अन्त्य गर्दै सबैलाई समेटेर महाधिवेशनपछि पार्टीलाई एक ढिक्का बनाएर लैजाने जिकिर गरे । 

उनले जनताको बहुदलीय जनवाद (जबज) को मार्गदर्शनमा एकता र सहमतिका साथ पार्टीको नयाँ नेतृत्व चयन गर्नुपर्नेमा जोड दिए । एमालेको महाधिवेशन यही मङ्सिर २७ देखि २९ गतेसम्म काठमाडौंमा आयोजना हुँदै छ ।