काठमाडौं– फागुन २१ को आम निर्वाचनमा रुपन्देही क्षेत्र नम्बर– १ बाट नेपाली कांग्रेसले प्रत्यक्ष महिला उम्मेदवारका रूपमा आयुसा कँडेल (टीका) को नाम सिफारिस गरेको छ । 

क्षेत्रीय कार्यसमिति, जिल्ला नेतृत्व, महिला संघ, युवक संघ तथा स्थानीय जनप्रतिनिधिहरूको सहमतिमा कँडेलको नाम अगाडि सारिएको बताइएको छ ।

पार्टी संरचनामा ‘नयाँ पुस्ताको ऊर्जा, स्थानीय सम्पर्क सञ्जाल, नीतिगत स्पष्टता र प्रभावशाली कूटनीतिक पहुँच’ले नेतृत्व रूपान्तरण आवश्यक रहेको तर्क प्रस्तुत गर्दै कँडेललाई प्रत्यक्ष प्रतिस्पर्धाका लागि सिफारिस गरिएको बताइएको छ । 

कँडेल हाल राष्ट्रिय युवा परिषद्की बोर्ड सदस्यका रूपमा युवामा नीति–संरचना, सहभागिता, रोजगार र नेतृत्व विकासका मुद्दामा सक्रिय छिन् । त्यसैगरी, ग्रामीण तथा सीमावर्ती क्षेत्रका महिलामा आर्थिक आत्मनिर्भरता, कानुनी पहुँच र नेतृत्व सीप विकासमा उनको निरन्तर संलग्नता रहेको छ ।