काठमाडौं– पोखरा पल्टन वुमन्स च्याम्पियनसिप (डब्लुसीएल) २०१९ मा अन्तिम खेलमा जीतसँगै प्रतियोगिताबाट बाहिरिएको छ ।

सोमबार त्रिभुवन विश्वविद्यालय क्रिकेट मैदानमा भएको खेलमा ललितपुर फाल्कोन्सलाई ६ विकेटले पराजित गर्दै पोखराले आफ्नो यात्रामा बिराम लगाएको हो ।

टस जितेर पहिलो ब्याटिङ गरेको ललितपुरले दिएको १ सय २३ रनको लक्ष्य पोखराले १७ ओभर २ बलमा मात्र ४ विकेट गुमाएर पूरा गर्‍यो । पोखराको जीतमा ब्याटवुमन कविता कुँवरले अविजित ६१ रनको अर्धशतकीय इनिङ्स खेलिन् भने बिन्दु रावलले ४० रन प्रहार गरिन् । पोखराविरुद्ध ललितपुरकी ममता चौधरी र नेरी थापाले समान २–२ विकेट लिईन् ।

यसअघि टस जितेर पहिले ब्याटिङ गरेको ललितपुरले २० ओभरमा ७ विकेट गुमाएर १ सय २२ रन बनाएको थियो ।

ललितपुरका लागि ममता चौधरीले अविजित ५२ रनको अर्धशतकीय इनिङ्स खेलिन् भने कविता जोशीले ३१ तथा सम्झना खड्काले १० रन बनाईन् ।

ललितपुरविरुद्ध पोखराकी सिता राना मगरले २ विकेट लिईन् । अन्तिम खेलमा जीत निकालेको पोखरा सान्त्वनासहित प्रतियोगिताबाट बाहिरिदा ललितपुर भने जितविहिन रहँदै आफ्नो यात्रामा बिराम लगायो ।

प्रतियोगितामा चितवन राइनोज फाइनल पुगिसकेको छ । यस्तै क्याट क्विन्स काठमाडौं र विराटनगर टाईटन्स इलिमिनेटरमा पुगेमा पुगिसकेका छन् ।