काठमाडौं- नेकपा एमालेका अध्यक्ष केपी शर्मा ओलीले आशन्न एघारौँ महाधिवेशनको हलबाट विधान संशोधन गराउने सम्भवना बढेको छ।

त्यसका लागि उनले आफूनिकट नेताहरूसँग बाक्लो सम्वाद गरिरहेका छन् । ओलीले आफूलाई अध्यक्ष पदमा चुनौती दिएका वरिष्ठ उपाध्यक्ष ईश्वर पोखरेललाई कमजोर बनाउने रणनीतिसहित विधान संशोधन प्रस्ताव महाधिवेशन हलमा लैजान लागेका हुन् ।

उनीनिकट नेताहरूका अनुसार २०७८ मंसिर १० देखि १३ गतेसम्म चितवनमा भएको दशौँ महाधिवेशनमा कायम पदाधिकारी संख्या (१९) नै कायम गर्ने गरी ओलीले छलफल थालेका छन् ।

अहिले एमालेमा १८ जना पदाधिकारी छन् । एकजना सचिव टोपबहादुर रायममाझी नक्कली भुटानी शरणार्थी प्रकरणमा हाल केन्द्रीय कारागारमा सजाय काटिरहेका छन् ।

उपाध्यक्ष विष्णु पौडेल र उपमहासचिव पृथ्वी सुब्बा गुरुङसमेत आफ्नोतर्फ खुलेपछि ओलीका लागि नेता व्यवस्थापन चुनौतीपूर्ण बनेको छ।

अहिले एमालेमा महासचिवका लागि प्रदीप ज्ञवाली र पृथ्वी सुब्बा गुरुङले तीव्र इच्छा देखाएका छन् । उता वर्तमान महासचिव शंकर पोखरेल पनि दोहोरिने दाउमा छन् ।

यस्तोमा ओलीले सबै नेतालाई अटाउने गरी १० औँकै पदाधिकारी कायम गर्ने गरी ११ औँ महाधिवेशनको हलमा विधान संशोधन प्रस्ताव लैजान छलफल अघि बढाएका हुन् ।

अध्यक्ष ओलीका विश्वासपात्र एवम् उपमहासचिव प्रदीप ज्ञवालीले एघारौँ महाधिवेशन अगाडि विधान संशोधन प्रस्ताव अघि बढ्न सक्ने बताएका छन्।

आइतबार खबरहबसँग कुरा गर्दै ज्ञावलीले एघारौँ महाधिवेशन अगाडि सचिवालय बैठकले निर्णय गरेर महाधिवेशनको हलबाट विधान संशोधनको निर्णय हुन सक्ने बताएका छन् ।

‘विधान संशोधन हुनसक्छ, यसबारेमा हामीले सबै कोणबाट छलफल गरिरहेका छौँ,’ज्ञवालीले खबरहबलाई भने, ‘महाधिवेशनको हलले चाहेको खण्डमा विधानका केही कुराहरू परिमार्जन हुन सक्छन्।’

ज्ञवालीले संकेत गरेअनुसार वरिष्ठ उपाध्यक्ष लगायतका पद फर्किने सम्भावना छ । ओलीले कात्तिक २० देखि २२ सम्म ललितपुरको गोदावरीमा भएको दोस्रो विधान महाधिवेशनबाट वरिष्ठ उपाध्यक्ष पद हटाइदिएका थिए ।

तर आफूलाई चुनौती दिएका पोखरेल मानेमा उनलाई त्यही पदमा कायम राख्नेगरि विधान संशोधनमार्फत् हाल घटाएर १५ बनाइएको पदाधिकारी संख्या १९ या २१ पनि बनाउने रणनीति ओलीको छ।

तर यसअघि गुण्डु पुगेका पोखरेलले ओलीको उक्त प्रयासप्रति आपत्ति जनाएका छन् । उनले आफू अघि बढिसकेको अवस्थामा अब कुनै पद या प्रस्तावमा सहमति हुन नसक्ने जवाफ दिएका छन् । उनले प्रतिस्पर्धामै गएर सबै कुराको छिनोफानो गर्नु उचित हुने जवाफ ओ‌लीलाई दिएका छन्।

तर ओलीले पदाधिकरी संख्या बढाएर आफ्नोतिर खुलेका र १० औँ महाधिवेशनका सबै पदाधिकारीलाई कायम गर्दै, केही नयाँलाई पनि समेट्न विधान संशोधन गर्न चाहिरहेका छन् ।