काठमाडौं– सडक डिभिजन हेटौंडाले हेटौंडामा सडक संरक्षण सुरु गर्न लागेको छ  । 

शुक्रबार एक विज्ञप्ति जारी गर्दै हेटौंडा–१५ रातोमाटेदेखि बुद्धचोक हुँदै राप्ति पुलसम्म महेन्द्र राजमार्ग र बुद्धचोकदेखि सामरी पुलसम्म त्रिभुवन राजपथको सडक सीमा खाली गराउने काम सुरु हुन लागेको जानकारी दिएको हो । 

सडक डिभिजन हेटौंडाले सो क्षेत्र खाली गराउन मंसिर ५ गते गोरखापत्रमा सूचना प्रकाशित गरिसकेको थियो। अब मंसिर २० गतेदेखि सडक संरक्षण कार्य औपचारिक रूपमा प्रारम्भ गर्ने जनाएको छ।

यसका लागि सडक सीमाभित्र रहेका होटल तथा आवास गृहहरुलाई आजदेखि नयाँ अतिथि नबसाल्न अनुरोध गरिएको छ। डिभिजनले होटल व्यवसायी संघ हेटौंडालाई पत्र पठाउँदै सबै व्यवसायीलाई जानकारी गराउन समेत भनेको छ।

डिभिजनका अनुसार सडकको दिगो संरक्षण र आवश्यक संरचना व्यवस्थापनका लागि सीमा खाली गराउनुपर्ने भएको हो।

उक्त कार्यका लागि जिल्ला प्रशासन कार्यालय मकवानपुरलाई समेत समन्वयका लागि जानकारी गराइएको छ।