एजेन्सी– पाकिस्तानले अफगानिस्तानमा संयुक्त राष्ट्रसङ्घीय राहत आपूर्तिलाई अस्थायी अनुमति दिने तयारी गरी रहेको अधिकारीहरूले बिहीबार बताएका छन् । गत अक्टोबरमा दुई छिमेकीहरूबीच भएको घातक झडप पछि पहिलो पटक आंशिक रुपमा सीमा खोल्न लागिएको उनीहरूले बताएका छन् ।  

सन् २०२१ मा तालिवान अधिकारीहरूले काबुलमा पुनः नियन्त्रण लिए देखि यी देशहरू बढ्दो विवादमा फसेका छन् । अफगानिस्तान सरकारले इस्लामावादले सीमापार आक्रमण गर्ने आतंकवादीहरूलाई शरण दिएको आरोप लगाएको छ भने इस्लामावादले आरोपको अस्वीकार गरेको छ । 

संयुक्त राष्ट्रका एजेन्सीहरूको औपचारिक अनुरोधको जवाफमा पाकिस्तान सरकारले अफगानिस्तानमा सहयोगको आवागमनलाई अनुमति दिने तयारी भएको एक जना सरकारी अधिकारीले नाम नछाप्ने सर्तमा बताएको एएफपीले जनाएको छ । 

आपूर्तिमा खाना, औषधि र चिकित्सा उपकरण, र ‘स्वास्थ्य र शिक्षासँग सम्बन्धित अन्य आवश्यक सामानहरू“ समावेश रहेको अधिकारीले बताएका छन् । अधिकारीका अनुसार सहायता हस्तान्तरण ‘तीन चरण’ मा हुनेछ ।

यसै बिच संयुक्त राष्ट्रसङ्घका एक अधिकारीले पनि सहायता चाँडै अफगानिस्तानमा प्रवेश गर्न अनुमति दिइने पुष्टि गरेका छन् । अक्टोबरमा भएको द्वन्द्व पछि सीमा बन्द गरिएको छ, भने पाकिस्तानबाट निष्कासन गरिएका अफगानहरूलाई मात्र सीमा पार गर्न अनुमति दिइएको छ ।

पाकिस्तानी अधिकारीले सीमामा सबै व्यापार बन्द रहने र सहायताका लागि आंशिक रूपमा “सशर्त“ खोल्ने बताएका छन् ।  

पाकिस्तानले अफगानिस्तानसँग सामान्य व्यापार वा आप्रवासनका लागि नभई अत्यावश्यक सामाग्री ल्याउनका लागि मात्र अस्थाई रुपमा सीमा खोलेको अधिकारीले प्रस्ट पारेका छन् । 

विश्व ब्यांकका अनुसार पाकिस्तान अफगानिस्तानको सबैभन्दा ठुलो व्यापारिक साझेदार हो, जसले चामल, औषधि र कच्चा माल आपूर्ति गर्दछ ।