काठमाडौं– नेपालको खेतीयोग्य जमिनको माटोको गुणस्तर दिनानुदिन खस्कँदै गएको सरकारी तथ्यांकले देखाएको छ । 

कृषि विभागको पछिल्लो डिजिटल माटो नक्साअनुसार, जाँच गरिएको कुल माटोमध्ये ५४ प्रतिशत अम्लीय प्रकृतिको पाइएको छ, जुन गत वर्षको तुलनामा १ प्रतिशत बढी हो ।

प्राङ्गारिक पदार्थको कमी, पोषक तत्त्वको असन्तुलन, भूक्षय, माटोमा रासायनिक मल प्रयोगमा सन्तुलन लगायतका कारणले माटोको गुणस्तर खस्किँदै गएको विभागले जनाएको छ । 

विभागका अनुसार प्राङ्गारिक पदार्थको कमीका कारण औसत २.५९ प्रतिशत, पोषक तत्त्वको असन्तुलन २८ प्रतिशत, नाइट्रोजन र पोटास, तथा फस्फोरसको कमी ३५ प्रतिशत र भूक्षयका कारण बर्सेनि करिब १.७ मिलिमिटर मलिलो माटो बगेर गइरहेको छ । 

पश्चिम नेपालको तुलनामा पूर्वी नेपालमा यो समस्या झन् विकराल रहेको विभागको तथ्यांक छ ।