काठमाडौं- आफूलाई जेन-जी अभियन्ता बताउँदै आएका सुधन गुरुङले काठमाडौं महानगरपालिकाका मेयर बालेन्द्र साह र ऊर्जामन्त्री एवम् उज्यालो नेपाल पार्टीका संरक्षक कुलमान घिसिङबीच एकता भएको दाबी गरेका छन् ।

उनले बालेन र कुलमानलाई मिलाएकाले अब राष्ट्रिय स्वतन्त्र पार्टीसँग पनि एकताका लागि आफू सभापति रवि लामिछानेलाई भेट्न नख्खु कारागार पुगेको बताएका छन्।

उनले बालेन र कुलमानको एकतापछि जेन-जी आन्दोलनमा गरेको वाचाअनुसार एकता संवादको लागि सभापति लामिछानेसँग भेट गर्न लागेको बताएका छन् ।

‘हामी उहाँसँग संवाद गर्दैछौँ’, उनले भने, ‘हामी यसबारेमा उहाँको धारणा पनि सुन्नेछौँ।

रास्वपा स्रोतका अनुसार गुरुङले भेट्न बिहीबार दिउँसो २ बजे भेट्न समय मागेका थिए । रविले सहमति दिएपछि उनी कारागार पुगेका हुन्।

सबै वैकल्पिक शक्तिलाई एक ठाउँमा ल्याउने बाचाअनुसार वार्ता गरिरहेको गुरुङले बताएका छन्। बालेन र कुलमानको एकतापछि अब रास्वपासँग पनि एकता गर्नुपर्ने उनले बताएका छन् ।