काठमाडौं- भारतको उत्तर प्रदेश राज्यमा नेपाली नागरिक सवार बस दुर्घटना हुँदा तीन जानको ज्यान गएको छ । दुर्घटनामा अरु २४ जना घाइते भएका छन् ।

सुनौलीबाट राजधानी दिल्लीतर्फ जाँदै गरेको बस उत्तर प्रदेशको बलरामपुर जिल्लामा ट्रकसँग ठोक्किएर दुर्घटनामा परेको हो ।

न्यानो लुगा बोकेर असमतर्फ जाँदै गरेको ट्रकसँग ठोकिएपछि उक्त बस बिजुुलीको हाइटेन्सन तारसँग सम्पर्कमा आएको थियो ।

बिजुलीको हाइटेन्सन तार छोएपछि दुबै सवारीमा आगलागी भएको इण्डिया टुडेले जनाएको छ । आगलागीले बस खरानी भएको थियो ।

प्रत्यक्षदर्शीहरुले केही यात्रु बसको झ्यालको शिशा फोरेर भाग्न सफल भएको जनाएका छन् ।

तत्कालै उद्धारकर्ता र प्रहरी घटनास्थल पुगेका थिए । उद्धारकर्ताले घाइतेको उद्धार गरी नजिकैको अस्पताल पुर्‍याएका थिए । घाइतेमध्ये छ जनाको अवस्था गम्भीर छ ।