काठमाडौं- नेकपा एमालेका अध्यक्ष केपी शर्मा ओलीले आगामी मंसिर २७ गतेदेखि भक्तपुर र काठमाडौंमा हुने एघारौँ महाधिवेशनमा प्रतिस्पर्धा गर्न कसैलाई नरोकिने बताएका छन् ।

केन्द्रीय कार्यालय च्यासलमा आइतबार आयोजित कार्यक्रममा बोल्दै आफूलाई अध्यक्षमा चुनौती दिन तयार वरिष्ठ उपाध्यक्ष ईश्वर पोखरेललाई छेवैमा राखेर यस्तो बताएका हुन् ।

उनले एघारौँ महाधिवेशनमा चुनाव हुने बताउँदै प्रतिस्पर्धाका लागि कसैलाई नरोक्ने उल्लेख गरे । ‘महाधिवेशनमा चुनाव हुन्छ । प्रतिस्पर्धा गर्न दिइन्छ। प्रतिस्पर्धालाई हामी नराम्रो मान्दैनौँ’, उनले भने, ‘हामीले रोजेर नै ल्याएका हौँ प्रतिस्पर्धाको विधि। त्यसमा हामी सबैलाई छुट दिन्छौँ । प्रतिस्पर्धा गर्न हामीलाई निषेध गर्दैनौँ ।’

उनले सार्वभौम एमाले कार्यकर्ताका सार्वभौम प्रतिनिधिलाई केन्द्रीय कमिटीमा उठ्न रोकतोक नगरिने बताए । उनले यसो भनिरहँदा अध्यक्षका लागि तम्तयार वरिष्ठ उपाध्यक्ष पोखरेल छेवैको कुर्सीमा थिए । पोखरेलले यस पटकको महाधिवेशनमा अध्यक्ष पदमा उठ्ने घोषणा गरिसकेका छन् ।

तर शनिबार भएको महाधिवेशन प्रतिनिधि छनोटको नतिजाले ओलीलाई बलियो देखाएको छ। भूगोलका प्रतिनिधि घटाएर जनसंठन, विभाग र आयोगबाट धेरै ल्याउने व्यवस्थाका कारण ओलीले तेस्रो पटक अध्यक्ष हुन आफूलाई कसैले रोक्न नसक्ने हिसाब निकालेका छन्।