काठमाडौं- आगामी ११ औँ महाधिवेशनका लागि नेकपा एमाले जिल्ला कमिटी ओखलढुंगाबाट सबै महाधिवेशन प्रतिनिधि वरिष्ठ उपाध्यक्ष ईश्वर पोखरेल पक्षीय आएका छन् ।

प्रतिनिधि छनौटका लागि शनिबार भएको मतदानपछिको परिणामअनुसार सबै १२ जना प्रतिनिधिहरू पोखरेल पक्षका विजयी भएका हुन् ।

१२ प्रतिनिधिमा खुलातर्फ अम्बिरबाबु गुरुङ, ज्ञानबहादुर खड्का, कमल प्रसाद न्यौपाने, अशोक थापा, राजीव कटवाल र केदारबाबु बस्नेत छन् ।

उता महिलातर्फ इच्छाकुमारी गुरुङ, जुना विक, पशुपति गुरुङ र रमिला मगर श्रेष्ठ पनि पोखरेल पक्षकै हुन् । ४० वर्षमुनिको युवातर्फ टीकाराम धमला र दलिततर्फ ज्यानु कालिकोटे महाधिवेशन प्रतिनिधिमा विजयी भए । उनीहरू सबै ओखलढुंगामा पूर्वप्रदेशसभा सदस्य अम्बिरबाबु गुरुङनिकट हुन् ।

ओखलढुंगा वरिष्ठ उपाध्यक्ष पोखरेलको गृहजिल्ला पनि हो । अम्बिर गुरुङ वरिष्ठ उपाध्यक्ष पोखरेलनिकट हुन् । गुरुङ अहिलेबाटै पोखरेलको पक्षमा खुलेर लागिसकेका छन् ।

ओखलढुंगामा १२ जना प्रतिनिधिका लागि ४१ जनाको उम्मेदवारी थियो । तर सहमति नजुटेपछि निर्वाचन कमिटीले पार्टीको अन्तरपार्टी निर्देशनअनुसार मतदान गराएको हो । ओखलढुंगामा १५१८ जनाले मतदान गरेका थिए ।