काठमाडौं – नेकपा (एमाले)का नेता विष्णु रिमालले पार्टी सामूहिक बल भएको बताएका छन् । एमालेको ११ औं महाधिवेशनको संघारमा नयाँ नेतृत्व निर्माणको चरणमा प्रवेश गरेको भन्दै रिमालले यस्तो बताएका हुन् ।

सामाजिक सञ्जालमा सक्रिय रिमालले फेसबुकमा लेखेका छन् ‘एमालेः नीतिमा दृढता र नेतृत्वमा एकता ।

पार्टी भनेको टीम हो–सामूहिक बल हो। सयौं फूलसँगसँगै फुल्ने फूलबारी हो।‘एकले सबैलाई र सबै मिली एकलाई’ अघि बढाउने साझा थलो हो।’

नेकपाका प्रथम महासचिव पुष्पलालको सही विचार भए पनि टीमको अभावमा अघि नबढेको उनको भनाइ छ ।

मनमोहनको शालीनताले तत्कालीन मालेको गतिशीलता पाएपछि उचाइ लिएको भन्दै उनले जननेता मदन भण्डारीले ‘गति र भावना’ मिल्ने साथीकै बलमा मार्क्सवादको सिर्जनात्मक प्रयोग गरेको बताएका छन् ।

‘अहिले हामी पार्टीको एघारौं महाधिवेशनको संघारमा छौँ– र नयाँ नेतृत्व निर्माणको चरणामा प्रवेश गर्दै छौं’, रिमालले फेसबुकमा लेखेका छन्, ‘यतिखेर करिब ७ लाख सदस्यले आफ्नो तर्फबाट नेतृत्वका लागि मतदान गर्ने प्रतिनिधि चुनिसक्नु भएको छ। निर्वाचित सबै प्रतिनिधि कमरेडहरूलाई हार्दिक बधाई ।’