काठमाडौं– दाङमा नेकपा एमालेको ११औँ राष्ट्रिय महाधिवेशनका लागि प्रतिनिधि छनोट प्रक्रियामा गम्भीर विवाद उठेको छ ।

महाधिवेशन प्रतिनिधि उम्मेदवार सुरेश गौतमले सार्वजनिक विज्ञप्ति जारी गर्दै जिल्लामा गरिएको प्रतिनिधि चयनलाई विधि, विधान र केन्द्रीय निर्देशनविपरीत भएको भन्दै खारेज गर्न माग गरेका छन् ।

गौतमका अनुसार दाङमा प्रतिनिधि छनोट मनपरी ढंगले गरिएको छ । निर्वाचन समिति गठन, मतदाता नामावली प्रकाशन र अन्य अनिवार्य प्रक्रियाहरू बेवास्ता गरेर एकलौटी शैलीमा नाम टुङ्ग्याइएको आरोप छ । उनले यसलाई पार्टीको लोकतान्त्रिक अभ्यास माथिको प्रत्यक्ष प्रहार भनेका छन्।

विवादको मुख्य केन्द्रमा महासचिव शंकर पोखरेलको नामसमेत जोडिएको छ । जिल्ला नेतृत्वले प्रतिनिधि छनोट महासचिवको निर्देशनमा गरिएको दाबी गरिरहेको भन्दै गौतमले यो सत्य भए विधानकै धज्जी उडाइने गम्भीर विषय हुने बताएका छन् ।

महासचिवको नाम दुरुपयोग गरेर स्वेच्छाचारिता वैध ठहर्‍याउने प्रयास अस्वीकार्य भएको उनको भनाइ छ ।

गौतमले चार प्रमुख त्रुटि उठाएका छन्–
१) निर्वाचन प्रक्रिया नै सुरु नगरी प्रतिनिधि घोषणा ।
२) महासचिवको नाम जोडेर मनपरी निर्णय ।
३) विधान र नियमावलीको स्पष्ट उल्लङ्घन ।
४) हजारौँ सङ्गठित सदस्यको मताधिकार खोसिएको अवस्था ।

उनले दाङमा गरिएको प्रतिनिधि छनोट तत्काल खारेज गर्न, विधानअनुसार निष्पक्ष र पारदर्शी प्रक्रिया पुनः सुरु गर्न र स्वेच्छाचारिता गर्ने जिल्लास्तरका नेतामाथि कारबाही गर्न माग गरेका छन् ।

गौतमले यस्तो अभ्यासले पार्टीलाई गम्भीर क्षति पुर्‍याउने चेतावनी पनि दिएका छन् । दाङका पार्टी सदस्य र समर्थकलाई स्वस्थ, पारदर्शी र लोकतान्त्रिक अभ्यासका लागि साथ दिन आग्रह गरिएको छ ।