काठमाडौं – धरानमा एमालेको ११औँ राष्ट्रिय महाधिवेशनसम्बन्धी तयारी बैठकमा दुई गुटबीच कुटाकुट भएको छ। नगर पार्टी कार्यालयमा भएको छलफलको बीचमै विवाद चर्किँदा ईश्वर पोखरेल समूहका अनिल राजधामी कुटिएका हुन्।

बिहीबार दिउँसो युवा प्रतिनिधि छनोट प्रक्रियालाई लिएर आन्तरिक सहमति गर्ने कि निर्वाचनमा जाने भन्ने विषयमा छलफल सुरु भएको थियो । सोही विषयमा उठेको मतभेद झडपमा बदलिएको सहभागीहरूले बताएका छन्।

प्रत्यक्षदर्शीका अनुसार विवाद बढ्दै गएपछि राजधामीलाई पार्टी कार्यालयबाट नेपाल बैंक छाता चोकतर्फ तानेर कुटिएको थियो । राजधामीले युवा प्रतिनिधिका लागि प्रतिनिधिसभा निर्वाचन क्षेत्र नम्बर १ बाट उम्मेदवारी दिएका थिए । उम्मेदवारी फिर्ता गर्न नमानेपछि संस्थापन पक्षले उनीमाथि कुटपिट गरेको बताइएको छ ।

कुटपिटबाट घाइते राजधामीलाई तत्कालै विजयपुर अस्पतालमा लगिएकाे थियाे । त्यहा सामान्य उपचारपछि उनी घर फर्किएका छन् । घटनाबारे एमाले नेतृत्वले हालसम्म कुनै आधिकारिक प्रतिक्रिया दिएको छैन।