काठमाडौं – हास्य टेलिश्रृंखला ‘सक्किगोनी’ को टिमविरुद्ध प्रहरीमा कपिराइटको उजुरी परेको छ । नेपाल टेलिभिजनबाट प्रशारण भइरहेको हास्य टेलिश्रृंखला सक्किगोनीको टिमविरुद्ध मिडिया हबले महानगरीय प्रहरी परिसर टेकुमा कपिराइटको उजुरी दर्ता गरेको हो ।

यसअघि मिडिया हबले उत्पादन गरेको टेलिश्रृंखला ‘भद्रगोल’ का पात्रहरु अर्को टेलिश्रृंखलामा प्रयोग गरिएको भन्दै उसले प्रहरीमा उजुरी गरेको बुझिएको छ ।

प्रहरीले यस विषयमा छलफल गर्न कलाकार अर्जुन घिमिरे (पाँडे) र कुमार कट्टेल (जिग्री) को समूहलाई बोलाएको छ ।

महानगरीय प्रहरी परिसर टेकुले छलफलका लागि आफूहरुलाई बोलाएको घिमिरेले खबरहबलाई बताएका छन् । आफ्ना क्यारेक्टरहरुको नक्कल गरेको भन्दै आफूहरुविरुद्ध कपिराइटको उजुरी हालेको उनले पुष्टि गरे ।

मिडिया हबका प्रमुख सोमप्रसाद धितालले सक्किगोनीको टिम विरुद्ध आफ्ना क्यारेक्टरहरुको प्रयोग गर्न रोकियोस भनेर उजुरी हालेको बताएका छन् ।

यता, कलाकार घिमिरे (पाँडे)ले भने ती सबै क्यारेक्टर आफूहरुको सिर्जना भएकाले मिडिया हबले कुनै दाबी गर्न नमिल्ने प्रष्ट पारे ।

यसअघि भद्रगोलमा काम गरेका जिग्री–पाँडेको समूहले हास्य टेलिश्रृंखला सक्किगोनी निर्माण थालेका थिए । भद्रगोल टिमबाट छुट्टिएर जिग्री–पाँडे समूहले अर्को टेलिश्रृंखला निर्माण गरेपछि मिडिया हबसँगको सम्बन्ध चिसिएको थियो ।