काठमाडौं- नेकपा एमाले छाडेका नेता भरतप्रसाद दुलाल कात्तिक १९ गते गठित नेपाली कम्युनिस्ट पार्टीका केन्द्रीय सदस्य भएका छन् ।

नेकपा एमाले दोलखाका पूर्व सचिव तथा सैलुङ गाउँपालिकाका अध्यक्ष दुलाल मंगलबार प्रवेश गरेसँगै नेकपामा केन्द्रीय सदस्य भएका हुन् ।

उनलाई मंगलबार नेकपाका संयोजक पुष्पकमल दाहाल ‘प्रचण्ड’ र सह–संयोजक माधवकुमार नेपालले पार्टी प्रवेश गराएका थिए ।

पार्टी प्रवेशपछि दुलालले वर्तमान वस्तुगत परिस्थिति र कम्युनिस्ट आन्दोलनलाई एकीकृत रूपले अघि बढाउन एमालेभित्र सम्भव नदेखिएकाले आफू नेकपामा आएको बताए।

सबै कम्युनिस्ट शक्तिहरू एक ठाउँमा उभिनु आजको आवश्यकता भएकोले आफू नेपाली कम्युनिस्ट पार्टीमा समाहित भएको उनले बताए ।

दुलाल लामो समय एमाले दोलखामा सक्रिय रहेर नेतृत्व गर्दै आएका थिए। पार्टीले दुलालले पाएको जिम्मेवारी इमान्दारीपूर्वक पूरा गर्ने अपेक्षा गरेको जनाएको छ।