दोलखा– रोजगारीको सिलसिलामा दक्षिण कोरियामा रहेका जिल्लाको वैतेश्वर गाउँपालिका-३ मिर्गेका युवाहरूले व्यक्तिगत रकम संकलन गरेर काल ढुङ्गा माध्यमिक विद्यालयका एक सय ४० जना विद्यार्थीलाई विद्यालय पोसाक (ट्रयाक सुट) वितरण गरिएको छ ।

मजुवा,पातले,ठाडे लगायतका गाउँबाट रोजगारीको सिलसिलामा दक्षिण कोरियामा रहेर काम गर्दै आएका विद्यालयका पूर्व विद्यार्थीसमेत रहेका उनीहरूले व्यक्ति-व्यक्तिबीच सहयोग संकलन जुटाएर विद्यालयका ईसीडि देखि कक्षा १२ सम्मका एक ४० जना विद्यार्थीलाई मंगलबार वैतेश्वर गाउँपालिका अध्यक्ष छवि लामाको हातबाट विद्यार्थीलाई विद्यालय पोसाक (ट्रयाक सुट) वितरण गरिएको विद्यालयका प्र.अ- पुष्करकुमार दाहालले जानकारी दिए ।

पोसाक वितरण कार्यक्रममा पालिका प्रमुख छवि लामाले  आफ्नो मेहनत र पसिनाबाट जोहो गरेको रकमले विद्यालय जस्तो पवित्र ठाउँ र कलिला विद्यार्थीलाई सहयोग उपलब्ध गराएर उदाहरणीय कार्य  गरेको उल्लेख गर्दै धन्यवाद व्यक्त गरेका छन् ।

उनले सो विद्यालयका विद्यार्थीहरूलाई विदेशमा रहेका सहयोगी दाइदिदि जस्तै परिश्रमी र उदाहरणीय बन्न आग्रह समेत गरे ।

शिक्षाको विकासका लागि चारैतिरबाट सहयोग अपरिहार्य रहेको बताए । कार्यक्रममा वडा नम्बर-३ मिर्गेका वडा अध्यक्ष कमल अधिकारी,विद्यालय व्यवस्थापन समितिका अध्यक्ष कमल अधिकारी, विद्यालयका प्रधानाध्यापक पुष्करकुमार दाहाल, सहायक प्रधानाध्यापक सुरेश तामाङ लगायतले सहयोगी पूर्व विद्यार्थीहरुलाई धन्यवाद प्रकट गर्दै विद्यालय र विद्यार्थी नै समाजको मेरुदण्ड भएकाले सहयोगलाई निरन्तरता दिन अनुरोध गरे ।

कालीढुङ्गा माध्यमिक विद्यालयमा आउँदो बिहीबारदेखि छैटौँ राष्ट्रपति रनिङ शिल्ड प्रतियोगिता समेत हुँदै छ। सुवाश बस्नेत/दोलखा