काठमाडौं– जेन-जी आन्दोलनका क्रममा प्रहरीले चलाएको गोली लागेर घाईते भएका ९ जनाको अझै विभिन्न अस्पतालमा उपचार भइरहेको छ । 

घाइतेमध्ये ३ जनाको ट्रमा सेण्टरमा उपचार भइरहेको छ भने काठमाडौं मेडिकल कलेज सिनामंगलमा ३ जना, टिचिङमा २ र १ जनाको स्पाइनल इन्जुरी पुनर्वास केन्द्र बनपामा उपचार भइरहेको स्वास्थ्य तथा जनसंख्या मन्त्रालयले जानकारी दिएको छ । 

मन्त्रालयका अनुसार गत भदौ २३ र २४ गते जेन-जीका नाममा भएको आन्दोलनका क्रममा घाइते भएर देशका विभिन्न अस्पतालमा उपचारका लागि पुगेका ५१ जनामो मृत्यु भएको थियो भने २ हजार ५ सय ७४ जना घाइते भएका थिए । 

२ हजार ५ सय १४ जना उपचार पछि डिस्चार्ज भइसकेका मन्त्रालयले जनाएको छ । आन्दोलनकारीले आगजनी गरेको भाटभटेनीमा जलेर मृत्यु भएका ७ जनाको भने सनाखत हुन सकेको छैन । उनीहरूको कंकाल टिचिङ अस्पतालको शव परिक्षण केन्द्रमा राखिएको छ ।