काठमाडौं– प्रधानमन्त्री सुशीला कार्कीले छोरीहरुमाथि छोरासरह लगानी गरे मात्रै समानता आउने बताएकी छिन् । लैङ्गिक हिंसा विरुद्धको १६ दिने अभियानको पहिलो दिन मङ्गलबार उनले अभिभावकलाई छोरीमाथि लगानी गर्न हिचकिचाउन नहुने बताइन् ।

उनले भनिन्, ‘वास्तवमा मनैदेखि छोरीमाथि लगानी छैन । सहरबजार र शिक्षित परिवारमा छोरीलाई छोरासरह शिक्षा दिए पनि ग्रामीण तथा विकटमा अझै छोरीलाई अवसरबाट वञ्चित गरेको पाइन्छ । उनीहरूले समानता बुझ्नै पाएका छैनन् । गरिबीमा समानता हुँदैन । खानै छैन कसरी समानता आउँछ ।’

प्रधानमन्त्री कार्कीले प्रत्यक्ष निर्वाचनमा जिताएर महिलालाई प्रधानमन्त्री बनाउनुपर्नेमा जोड दिइन् ।

उनले आफू अन्तरिम सरकारको प्रधानमन्त्री मात्रै भएको भन्दै समानताको कुरा साकार गर्नका लागि महिलालाई प्रत्यक्ष चुनावमा जिताएर प्रधानमन्त्री बनाउनुपर्ने उल्लेख गरिन् ।

उनले भनिन्, ‘महिला उम्मेदवारलाई झारा टार्न चुनाव जित्नै नसक्ने क्षेत्रको टिकट दिने अभ्यास छ । चुनाव हार्ने क्षेत्रमा टिकट दिइन्छ । प्रत्यक्ष निर्वाचनमा जितेर बनेको प्रधानमन्त्री भएमा समानता हुन्छ । अन्तरिम सरकारको प्रधानमन्त्री भएर महिलाको समानता भयो भन्नु गलत हो ।’