कलैया (बारा) – नेकपा एमालेका महासचिव शंकर पोखरेल र पोलिटब्यूरो सदस्य महेश बस्नेत बारा जिल्लामा आयोजना गरिएको कार्यक्रममा सहभागी हुन सिमरा हुँदै आउने क्रममा बुधबार दिउँसो तनाव उत्पन्न भएको छ।

सिमरा विमानस्थलमा जेन–जीको नाम लिएर एक समूहले तोडफोड तथा प्रदर्शन गरेपछि स्थिति केही समय नियन्त्रणबहिर पुगेको थियो। प्रदर्शनकारी र प्रहरीले एकअर्कामाथि ढुंगामुढा र धकेलाहेले गर्दै झडपसमेत भयो।

झडपकै बीच काठमाडौंबाट सिमरा उड्न लागेको बुद्ध एयरको जहाज पनि केही समय रोक्नु परेको थियो। सुरक्षाको संवेदनशीलता बढेपछि जिल्ला प्रशासन कार्यालय बाराले दिउँसो १२:३० बजेदेखि बेलुका ८ बजेसम्म जीतपुरसिमरा क्षेत्रमा कर्फ्यू आदेश जारी गर्‍यो।

यही घटनाबारे राष्ट्रिय स्वतन्त्र पार्टीले पनि आफ्नो धारणा सार्वजनिक गरेको छ। रास्वपा प्रवक्ता मनिष झाले एमाले नेताहरूलाई रोकिएको विषयमा सरकारको ध्यानाकर्षण गराउँदै राजनीतिक दललाई गतिविधि गर्न पाउनुपर्ने बताए।

उनले निर्वाचन नजिकिँदै गर्दा वातावरण बनाउन सबै दललाई कार्यक्रम गर्न पाउने स्वतन्त्रता सुनिश्चित हुनु जरूरी भएको बताए।

रास्वपाले भनेको छ, ‘निर्वाचनको माहोल बनाउन राजनीतिक दलले सार्वजनिक कार्यक्रम आयोजना गर्न पाउनुपर्छ र सरकारले आवश्यक सुरक्षा उपलब्ध गराउनुपर्छ। आज सिमरामा भएको घटना संवेदनशील छ। यसमा राष्ट्रिय स्वतन्त्र पार्टीको गम्भीर सरोकार र सरकारको आवश्यक ध्यानाकर्षण माग गर्दछौँ।’