काठमाडौं- नेकपा एमालेका उपाध्यक्ष उहाँ विष्णु पौडेलले भदौ २३ र २४ का घटना नियोजित रूपमा गराएर देश प्रतिगमनको गम्भीर चक्रमा फसिरहेको बताएका छन् ।

मंगलबार पार्टी केन्द्रीय कार्यालय च्यासलमा बसेको विघटित संसदीय दलको बैठकलाई सम्बोधन गर्दै उनले दुई दिनका घटनालाई ‘सिरानी हालेर’ अघि बढाइएको राजनीतिक हस्तक्षेपले अस्थिरता, संवैधानिक विपथन र सत्ता कब्जाको प्रयोजन स्पष्ट पारेको बताए।

‘भदौ २३ र २४ को घटनालाई सिरानी हालेर देशमा प्रतिगमन भएको छ, भदौ २३ र २४ का घटनाबाट संविधानमाथि प्रत्यक्ष आक्रमण भयो, संविधानलाई नै घाइते बनाइयो’, उनले भने, ‘यस्तो प्रतिक्रियावादी गतिविधिलाई सामान्य ठान्न मिल्दैन, देशलाई प्रतिगमनतर्फ धकेलिएको छ र यसका विरुद्ध दृढतापूर्वक उभिनु आजको ऐतिहासिक जिम्मेवारी हो।’

पौडेलले एमालेले उठाइरहेको प्रतिनिधि सभा पुनर्स्थापनाको मुद्दा पनि यही प्रतिगमनविरुद्धको सङ्घर्षसँग जोडिएको स्पष्ट पारे । संविधानविपरीत गरिएको कदमलाई वैधता दिन खोज्ने प्रयास सफल हुन नदिन जनतामाझ गएर दललाई सुदृढ बनाउनु पर्ने उनले बताए ।

उनले एमालेविरुद्ध अहिले चौतर्फी आक्रमण भइरहे पनि त्यो कुनै नयाँ कुरा नहुने उल्लेख गर्दै, ‘एमालेले आफ्ना सिद्धान्त, कार्यदिशा र जनताप्रतिको उत्तरदायित्वका आधारमा यी सबै चुनौती चिर्दै अघि बढ्न सक्छ र अवश्य नै अघि बढ्छ,’ भने ।

राजनीतिमा देखिएका पछिल्ला उथलपुथलका प्रसङ्ग समेट्दै उनले अहिले एमालेले सुरु गरेको आन्दोलनलाई देशको स्वाभिमान रक्षा गर्ने अभियानका रूपमा व्याख्या गरे ।

नेता पौडेलले वर्तमान राजनीतिक अवस्था सामान्य देखिए पनि भित्री रूपमा गम्भीर सङ्कट लुकेको बताउँदै देशलाई संवैधानिक व्यवस्था बाहिर धकेल्ने कुनै पनि प्रयोजनलाई रोक्नु ऐतिहासिक आवश्यकता भएको उल्लेख गरे । उनले दलभित्र एकता, अनुशासन र स्पष्ट राजनीतिक दिशासहित आन्दोलनलाई बलियो बनाउँदै जाने उल्लेख गरे ।