नेकपा एमालेका अध्यक्ष केपी शर्मा ओलीले गत भदौ २३ र २४ गतेको जेन-जी आन्दोलनका क्रममा दमन र हताहतीको जिम्मा आफूले लिनपुर्छ भन्नेलाई पार्टीविरोधीको संज्ञा दिएका छन् ।

गत भदौ २७ गते विघटन गरिएको प्रतिनिधिसभा संसदीय दलको बैठकलाई मंगलबार ललितपुरको च्यासलस्थित पार्टी केन्द्रीय कार्यालयमा सम्बोधनका क्रममा उनले यस्तो बताएका हुन् ।

समसामयिक राजनीतिक घटनाक्रमबारे सम्बोधनका क्रममा ओलीले उनले कसैलाई शरण दिनुको अर्थ देश भत्काउने नभएको पनि बताएका छन् । ‘कसैलाई शरण दिनु भनेको उसलाई देश भत्काउने, आगो लगाउने अधिकार दिनु होइन’, उनले भने ।

ओलीले जेन-जी आन्दोलनका क्रममा भएको दमनपछिको विध्वंश र आगजनीको जिम्मेवारी लिन नसक्ने पनि बताए ।

‘भदौ २३ र २४ गते भएको जेन-जी आन्दोलनको घटनाको जिम्मा लिनुपर्छ भनेहरू पार्टी विरोधी र नेतृत्व विरोधी हुन्’, उनले भने, ‘यो सरकार बनायो कसले ? जनताले त बनाएको होइन । यो अन्तरिम सरकार टेलिफोन र डिस्कर्डबाट बनेको हो ।’

उनले कुनै पनि सरकार राजनीति र चुनावबाट बन्ने बताए । ‘सरकार त राजनीतिबाट बन्छ । चुनावबाट बन्छ । त्यसैले अहिलेको अन्तरिम सरकार असंवैधानिक छ’, ओलीले भने ।