काठमाडौं – नेकपा (एमाले) नेतृ शान्ता चौधरीको अचारको आउटलेटमा आगजनी भएको छ। नेतृ चौधरीले आगजनीमा संलग्नलाई कारबाही गर्न माग गरेकी छन्।

उनले आफ्नो जिन्दगीका हरेक प्रयासमा आगजनी भएको भन्दै सामाजिक सञ्जाल फेसबुकमा चौधरीले लेखेकी छन्, ‘जिन्दगीको हरेक प्रयासमा आगो नै लाग्छ मलाई। सुर्खेतको शान्ताको अचार आउटलेट्मा कुन अपराधीले आगो लाइदिएछ। नेपाल प्रहरीलाई तत्काल अपराधी पत्ता लगाई कारबाहीका लागि अनुरोध गर्दछु।’

पूर्वसांसद चौधरीको अचार उद्योगको सुर्खेत वीरेन्द्रनगरस्थित शुक्रबार उद्घाटन भएको शाखामा आगजनी भएको हो ।

प्रहरीका अनुसार अचार उद्योगमा आइतबार बिहान करिब ३ बजेतिर आगलागी भएको हो । दमकलको सहयोगमा प्रहरीले तत्काल आगो निभाए पनि शुक्रबार उद्घाटन भएको उद्योगमा ठुलो क्षति भएको छ ।

शान्ताले आगजनी शंकास्पद भएको बताए पनि प्रहरीले आगो उद्योगबाटै उठेको अनुमान गरेको छ । आगजनीको क्षतिको विवरण भने आइसकेको छैन ।