काठमाडौं– नेकपा एमालेका उपाध्यक्ष गुरु बरालले संसद् पुनर्स्थापना गरि जेन-जी युवाहरूको माग पुरा गर्नुपर्ने बताएका छन् ।

विघटित प्रतिनिधिसभा पुनःस्थापनाको माग गर्दै एमाले मोरङले आयोजना गरेको प्रदर्शनसहितको सभामा उपाध्यक्ष बरालले भ्रष्टाचार नियन्त्रण र सुशासन जेन-जी युवाहरूको माग रहेकाले संसद् पुनर्स्थापना गरि माग पुरा गर्नुपर्ने बताएका हुन् ।

उनले जने-जी पुस्ताको आन्दोलनमा घुसपैठ भएकाले नै ठूलो जनधनको क्षति भएको बताए । यसको निष्पक्ष छानबिन गरी दोषीलाई कारवाही गर्न उनले माग गरे । जेन-जी पुस्ताको माग कानूनी राज्यको स्थापना हो भने सर्वोच्च अदालतमा किन आगो लाग्यो भन्दै उनले प्रश्न समेत गरे ।

मोरङको मिक्लाजुङ र रतुवामाईबाट निस्किएको मोटरसाइकल र्‍यालीले जिल्लाका विभिन्न भागको परिक्रमा पछि विराटनगर पुगेर महेन्द्र चोकमा सभामा परिणत भएको थियो ।